dragi moj Dnevniče...! sinoć nan je na bakti Sangi pobogu Brat o mojega pape
dava klas o temen ća je nepravilno mantranje i kako bakte ne Pazidu ća
govoru dok Mantradu i kako tribaju mantrat ka dite ća plače kad traži mater.
Onda nas je pita da jemamo li mi kakvih Realizacija o tomen. Ja san se
naravski oma javija i govorija kako Mantraju moj pape i mater, ma ne da bi
ji kritizira vengo da bi in pomoga ka napredniji u duhovnem životu (jerbo
san ja bramačari a oni grihašte, a osin tega ja san za razliku od nji Bakta
o rođenja i sigurno san neka velika Osoba čin san se rodija u Vajšnavskoj
familji, a ponizan san i ne mislin da san nešto posebno ća je još jedan
dokaz Moje Veličine).

Reka san kako je mantranje mojega ćaće dobro ća se tiče plakanja, naročito
kad ga mater dovati lazanjuron priko Škine, ali da onda krivo izgovara Maha
Mantru: "Ajme Kičma Ajme Kičma Kičma Kičma Ajme Ajme, Ajme Rame Ajme Rame
Rame Rame Ajme Ajme", a mater je isto dobra jerbo jako gorljivo Mantra, ali
jopet sa krivin tekston: "Pare Krišna, Pare Krišna Krišna Krišna Pare
Pare...". Kad su mater i otac čuli da san to o njiman reka isprid svih,
najprije su zinuli od izbezuma, a onda je papi počela ić ka nika pina na
justa i zacrvenile su mu se oči. Mater mi je vikala: "Špijun galijun, izi
g... na pirun!" (ona ustvari nije rekla "g...", ali ja ka Vajšnava ne smin
beštimat, već su me kritizirali da pišen puno Ružnih riči, pa ne bi tija da
se Bakte degradiradu jerbo me kritiziradu.)

Zavaljujući mojin velikin Strogostiman razvija san vrlo Fina čula, skoro da
judiman čitan Misli, tako kad je pape krenija prema Meni oma san ositija da
bi moga dobit Šakomicin u glavu, pa san brže boje uzeja utočište Lotosovih
stopala drugih Vajšnava. Uzeja bi ja češće i utočište u svoga ćaće, ali
njegova stopala se ćute na oni neki talijanski sir Pakorino, Štakorino oli
tako nekako. Kad smo već kod sira, da van ispričan ća se još dogodilo posli
Bakti sange kad je raja otišla ća i Barufa malo kalmala. Mater je posebno za
naše Goste doma sama učinila lazanje, jerbo oni ne jidu kupovnu Paštu. Onda
je pape sav grintav poslin onega ća se dogodilo za dišpet izvadija iz žepa
Sir parmezan i posuja svoje lazanje.

Njegov Pobogu Brat je izbečija oči da Tu Mač, ma je li on normalan, ća jide
kupovni Sir, ća su karmi činili, a onda se moj Stari isprsija da Ća je, oš
ti meni u mojoj Kući zapovidat ća ću ja Jist, ća ti sad nije Bonafajd, oli
se sir čini o mesa ili jaj. A ja san reka kako mislin da se parmezan čini o
ribe jerbo da na Njemu lipo piše: "Ribani parmezan" i da mi ne jimo sireve
koji su ribani, mesani i jajani, jerbo je to kršenje Regulativnih Principa.
Ima bit da je pape bija usta na livu nogu, cili je dan bija živčan, pa je i
sad odma počeja vikat da Bezobrazniče jedan blezobrazni neš ti mene učit.

Pobogu brat mu je reka da ko mu je Kriv ća me nije lipo odgojia ka i on
svojega malega, a bakta Krešto se na to ponosito isprsija pa mu je iz žepa
ispala Lila pauze čikolata. Onda se Krešto zacrvenija, a mi smo ga svi
zeleno pogledali, jerbo tako nešto nismo ni u Paklu očekivali od njega kad
se stalno Puva kako je on Napredan. Onda je Kreštin tata počeo govorit ženi
da Ženo daj mi apaurin, blokaće mi srce, a ona je rekla Nema ti nijednega,
ima bit da si zadnje popija jurtos. Moj je tata onda skočija da A tako
znači, intoksiciramo se.

Pobogu brat je reka ma kakva Intoksikacija, to su mi ljekovi. Žena mu je
onda rekla da će mu onda ona dat svoje lorsilane, ali ni ona nije našla
nijednega. Ja san sve zvižduka i gleda u plafon, da me ne bi oni ubrali
jerbo san ih ja sve bija marnija. Onda je moja mama rekla, Čekaj iman ti ja
Tavora. Onda ni ona nije našla nijednega. Onda san se ja sažalija pa san mu
ponudija svoje Artane. Na to su svi zinuli i gledali me ka da san pa iz
Duhovnog svita. Pape je opet počeja vikat i zvat me pogrdnim imenima ka ća
su Kriminalcu jedan, narkomanu i ovisniče. Ja san mu onda uzvratija da ja
nisan narkoman jerbo ne motan đojinte ka i druga dica iz škole i ne Gongan
se i ne boden, vengo umisto toga uziman likarije, jerbo san Dobar bakta i
želin slidit Regulativne principe.

jor hambl servant Bakta duje