Članci
Kalendar najava
Najave
Novosti
Galerije
Oglasi
Pojmovnik
Dokumenti
Kalendari
Trenutak inspiracije ::
Onaj tko poznaje transcendentalnu prirodu Moje pojave i Mojih djelatnosti po napuštanju tijela više se ne rađa u materijalnom svijetu, već dostiže Moje vrhovno prebivalište.
-- Bhagavad-gita 4.9 --
Članci ::
Članak, objavljeno: Čet, 05.10.06. 08:33
 

Dnevnik bh Duje 11

 
 

Dragi dnevniče, evo san opet ima nike zgode i nezgode koje mogu samo tebi povjerit, jerbo buden li komen šta reka, cili će iskon brujat o tomen. Ma to je jedna nevirovatna stvar, da ća god ja rećen ili učinin, oma se zna i u njujorku i na antarktiku, pari da San ja neka povisna Ličnost i važna mi Osoba. Zato ti se poviravan, jerbo znan da si ti Moj jedini prijatej i duša predana Meni i da nikon neš reć ća Ja u teben zapišen.
Tija bi otić u Templ. U oven Gradu nema društva za mene. Tija bi se družit sa čistin baktaman i da se ne iskontaminiran, jerbo je odi sve tu mač i ful u maji, totalni nonsens, a nije far aut ilitiga «far od auta» kako to moj pape zna izustit kad je s nečin zadivljen. Otija bi otić na sveto misto, možda u neki Templ u ameriku ili dikod drugdi na Zapad di je standard visok i judi jemadu puno para. To je važno, jerbo kako ću drukčije postić visok standard obožavanja Krišne. Onda, tamo su sve napridni bakte i Šrilaprabupadovi učenici. Od nji bi tija učit i šnjiman se družit, ka ća mi doliči.

Ća je na primjer primjera mogu naućit o svojega ćaće? Jedino kako se kritizira i kako se mačaje majica sa vegeterijanskom pašticadon. E, i kako se dere na mater, a i ona na njega. I to isprid nas dice, ća nije odgojno, ni higijenski, jerbo in pjuvaka štrapa iz just dok se dernjadu. I to oko čega, vengo oko para, ka najgori materijalisti. Ka onda kad je ona kupila najmanji kupači kostim na svitu, a košta je ka tri para rebatinki plus zimski kaput. I onda je stari urla da koliko je to para dala za stavit na onaj dil tila di leđa gubu časno ime, i to dva broja manji jerbo mater uvik planira smršavit pa kupi manju robu i onda nikad ne obuće jerbo su ti kili poprimili transcementalnu dimenziju pa se uvik ekspandiradu a ona njemu odgovorila da niti desetinu od onoga koliko on more izist. A on će njoj da je Šrilaprabupad reka da se mora izist dok se ne gega ka patka i da ona više ne triba jer je već ka guska, a na to će ona da ako je ona guska da je on gudin... Ja san onda svatija da bi ja onda mora bit križanac između guske i gudina ća mi je negodovalo jer san bija uvjeren da san dobija ljudski oblik.

Onda san ja čuja da je u tin stranjskin Templiman sve Bonafajd, papadu se sabađiji i somoze, čučadu se lipi šrikandi i sve je ka u duhovnen svitu, pa su ti čula kontrolirana, nemaš se ća brinit ka ovod di sve moraš u samoposlugu proviravat na etiketu da jeli bonafajd i da karmiji nisu čakod svinjarije ili konjarije metnili unutra. Ja tamo ništa ne bi mora radit, svi bi me služili jerbo bi odma pripoznali moju predanost Krišni i Guruu i oma bi svatili koliko san ja u stvari napredan i ponizan, samo to ne pokazujen kako nebi Bakte mislili da san na Fors Egu. Onda bi ja ponizno privatija njiovu službu, kako bi in milostivo da priliku da se i oni pročistu i budu ka Ja.

Isto ne bi otiša još u Indiju, jerbo san čuja da indija nije ća je nekad bila i da su sve niži standardi, biće svit nema para, a ja ne želin blupnit u cvitu mladosti, već se želin u oven životu vratit Krišni na Goloku Vrindavan, jerbo mi je duhovni učitelj reka da u stvari Krišna puno više želi da se Ja vratin u duhovni svit, nego ća ja to želin. Eto vidiš, dragi moj Dnevniče, koja san ja specijalna osoba, kad i gori Krišni toliko triban, a ovdi me niko ne šljivi ni dva Posto iako san bramačari od rođenja.

Ma ne želin ja kritizirat Bakte i govorit da su ovakvi i onakvi ka ća i jesu, ali moran uputiti konstruktivnu kritiku da su prvo i prvo sve matađi tu mač. Samo se šminkadu i maškaradu. Na Sandejfistu se oblačidu ka da su na modnu reviju. A prabusi se pravidu odvojeni, ma isto s njima čakulajedu sve u šesnajest. Nemoš od nji doć do riči, recimo kad bi ja s kojon ot tih matađis tija nasamo u četri oka popričat da je korigiran i tako to. Stega san odlučija napustit rodni mi dom i otić u stranjski Templ, di bi dobija prvu i drugu inicijalizaciju i hm azašto ne i san-jasu, pa bi se onda možda vratija u Split spasit ove pale duše ća sve više tonedu u zagrljaj Vještice maje. Sa sobon bi ponija samo tebe, moj Dnevniče i dva-tri stripa da mi ne bude dosadno po putu, Bagavadgita mi i ne triba, jerbo je svo znanje već tu u srcu. Lipo kad oćeš moš ćut Paramatmu kako ti sve govori priko medija od uma.

Eto, tako san dobija vruću želju za uteć o kuće, ma san isto i milostiv ka ća i dolikuje Vajšnavi, pa ću stat doma još neko vrime da mojiman dan šamsu da se iskupidu i postanedu čisti Bakte. Čvrsto san odlučija, da ako u roku od misec dan ne razviju sve duhovne odlike, ja iden ća. A to in je zadnji rok, jerbo onda počimje škola.
Toliko za sada, dragi Moj Dnevniče, jerbo se moran ić kupat na Baće, a to je pročišćavajuća djelatnost, jerbo u more utiču sve Svete Rijeke a ka moja kokosova stopala dotaknu tu vodu na Baćama još je sve i čišće.

Jor hambl srvant bakta Duje

PS. Sva Srića da ovo niko drugi neće ćitat osin par bakta na portalu ća in virujen da mogu otvorit um jerbo bi neki mogli krivo svatit da san ja ponosan, ali nisan, ja san ponizan, ali se dobre odlike jednostavno primaju na mene ka muve na ... med!

 
Najnovije
Oglasi
Aktualno
Galerije
Komentari
Prijava ::
Vaišnavski kalendar
Ankete ::
Kada ste zadnji puta naučili napamet novi stih iz šastra?
(33 glasa)
Ovih dana
Nedavno
Odavno
Odavno, i ne sjećate se
Nikada
     
Društvene mreže ::
Slijedi portal.iskcon.hr na Twitter-u
Statistika posjeta ::
Trenutačno je 38 posjetitelja online
 
 
Ova stranica pogledana je 408 puta.
 
Sponzori ::
ISKCON official ::
Vanjski linkovi ::