dragi Dnevniče...! Okad su došle ove vrućine, Mater vatadu fumade i stalno
zapomaže da Ajme gospe moja sinjska i da isuse moj Dobri, ča je ovo, oli je
doša Sudnji dan, i da joj o Brodi u portu priskoči srce jerbo pomisli da su
Trube jerihonske. a ćaća će joj da za gospu blaženu, Ma jesi li ti Normalna,
ma da kakvi sudnji Dan uimeisusa, ca brboćeš, Oli je vrag pakleni Uša u
tebe, oćeš li još počet Mantrat Sveto Ime na krunicu ovod isprid ovega
diteta, oliti Mene. I makni taj križ sa Tulasi ogrlice. Oču da mi Dica budu
Vajšnave ka i ja. A mater će njemu da si ti Pravi muž i Vajšnava, spasija bi
Nas od ovega ognja Paklenog, a on če njoj, Ća je, oćeš da ti sagradin nojevu
Arku. Ma ne, kaže mu Mater, odvedi nas na Litovanje, kako je lipo i kardamom
muni odveja Svoju ženu lipo da gušta, a nije Ju pustija da se kuva u
sotoninon loncu. Idemo se lipo kod tvoje matere na Vikendicu okupat. A jeli
reka je ćaća, sad ti je Svekrva dobra kad je Kupanje u điru, a prije ti je
bila SveKriva. Ali ajmo ča, možda se utopin ili me izi Morski pas, pa se
spasin od vas Parazita. Je reče mater, Ti bi se utapa pa da te Spasi pamela
anderson. Uimeisusovosveto, ma ća to govoriš Zabezeknija se ćaća. Je je reče
mater, vidila san te na Sandejfistu kako buljiš u žemske dok in Propovidaš.
Ma nije gospemi, reče ćaća, ja u njiman gledan vječnu Duču ća in prebiva u
Srcu a Mater če njemu Sarkofastično, E, a ća si ti bidan kriv ća in Srce
prebiva u pridilu Dekolteja.
Inšoma dela šoma, počeli smo se pakirat za put. Mater je tražila di su
mudantine za kupanje i maska i peraje i suncobran, moja mlaja sestra
Anđelina je skakala okolo i smetala, a ćaća je iša provirit uje i vodu u
Vimani kako on naziva svoj škodilak. Kad smo sve ubacili u Portapaki ćaća
upita a da di su Krišnine teće za kuvat. Ma nemoj reće mu Mater, da ti možda
ne bi na Litovanju kuvala. A ća ćemo jist upita ćaća. Znaš da moja mater
samo friga bržole i ribu. Mater mu reče, neću ja Sluškinjavat ni tebi ni
tvojoj materi. Ako ćeš jist kuvano, kužinavaj sam. Jupiii uzviknija san Ja,
mozemo jist tvrdega sira i kruva iz Samoposluge. Je, reče mu mater, a i
Gljive ti se mogu jist, samo se ne smidu nudit Božanstviman. A ja san još
reka da su oprat kisele krastavce iz tegle, da ne budu puno Tamastične od
kvasine i da ću se još najist bile čikolate Milka. A mater mu je još dodala,
a ti moreš vazest Fažol iz konzerve i pivu brez Alkokola. Ma jeste li svi
poludili, di van je Svisnost, skočija je otac, Oćete li još ić na kirtan u
Disko! Ma ga je mater ka i uvik smantala i uskoro je Vimana veselo torokala
prema vikendici.
Na po puta, ja san počeja Zanovitat: Ajme ća san žedan. Eno ti vode u boci
reka je ćaća. Ne mogu je pit, steplila se, kuka san Ja, a sestra je isto
grintala da oće sladoled na štapiću. Mater je rekla, je moga si stat dikod
kupit ladni Sprajt. Stari je grinta, ma je isto šta na pumpu i donija nan
bocun od dvi litre Sprajta i reka staroj: Aj ti ponudi, a ona se uvati
zaglavu, Astigamande nisan ponila sliku o Guruja. A šminku nisi zaboravila
ponit zagrinta joj ćaća, Aj ponudi u umu. Onda je ona dodala meni jerbo san
Ja najviše Zanovita i rekla: Pij iz zraka. A ja san odma namjerno prinija
bocu justin i reka: Ajme, zeznija san se, sad san sve Zakontaminira, pa vi
ne morete Pit, vengo samo ja. Na to je sestra opet počela urlikat da oće
sladoled na štapiću. Mukuti irudovu reće ćaća i stane kod prvog marketa i
donese jos jednu bocu Sprajta za njih troje. U međuvremenu se je moj Sprajt
zagrija, pa san tija pit iz njiovega. E onda je stari ispalija na živce: ako
zaništa drugo, zbog vas ću utec u Duhovni svit. A tada, netom prije mi se
zamračilo i ća san vidija sve zvizde Neba, stiga san reć: Eto vidiš kako je
dobra varnašrama Darma. Svako nađe svoje misto u Njoj. Da si osta Bramacari
možda ne bi ima nikakvoga Razloga da se vratiš Kući Bogu.