dragi DnevniČe...! okad smo na litovanju baŠ mi je bila gula i Prva liga.
Samo san se ita u more i Spejsira po cili dan, a dida je uvatija tatu da mu
pomaŽe slagat Blokete i nalivat teracu jerbo da pogledaj na Šta Vikendica
liČi. Tata je bija hevi raspoloŽen i stalno je brontulava da eto njega toka
Radit i liti da bimo se mi mogli Odmarat i Kupat a meni je baŠ bilo drago
jerbo me nije moga Kontrolirat, pa san sa lakŠmijen Ča mi je baba davala
kupova sladolede, Čikolate i kokakole i potajno ih ija i pija kad bi ka ono
iša u Đapa volk. I mater i sestra su se isto totalno raspustili i nije ih
bilo po cili Dan vengo su se samo točavali u More. A onda je jedan dan Idila
prestala kad je Dida reka da mogla bi ti Nevista čagod i Skuvat. Je reka je
tata, učini nan kakvi masni sabađi jerbo radin ka Konj po cili dan i nemogu
živit samo o Poma. Mater je uzdahnula Uh! i rekla da ajde dobro ali samo
danas i da neka baba i dida daju za bogu, jerbo smo mi išli na Inkanat. Tako
smo oti Dan svi ostali doma i ja san gulija Kumpire. Bila je to prva i
zadnja prilika da familja malo poprića.
Tata je pita didu da jeli baš mora toliko radit oko vikendice kad je Lito i
kad je upeka toliki Zvizdan. To će sine sve tebi ostat reka je dida. Je reka
je tata, ako umreš ka i svoj otac sa sto godin, ja ću to naslidit kad buden
ima osandeset. A dida je reka: Neka, Triba radit! Vidiš kako se i na Žnjanu
sve lipo priprema za doček svetog Oca. A baba je pitala da oćemo li i mi ić
vidit Papu. A okad si ti to vjernik, pita je moj otac svojega oca, kad si
prije rata bija u partiji? Je rekla je baba, bilo bi mu boje da je virova u
boga ka i ja, a ne da je bija komunista u vrime kad je bilo Komu sve, a Komu
ništa. Ma virova san ja u Našegagospodina Isusakrista, ali u sebi, reka je
dida, a ča vi dico ne virujete u Našega boga, vengo ste našli nekoga ča nije
odavle. A je, baš ti je Isus odavle, reka mu je tata, Rodija se na Kmanu, a
razapeli su ga na Peristilu. Mi ti virujemo u Našega Gospodina Čejtanju koji
je doša spasit najpalije. A, onda to nije za mene reka je dida, jerbo ja
nisan najpaliji. Ma čini mi se skroz dobra vira za tebe i za tvoju mater. A
jeli to istina pita je opet Dida, potajno ulivajući bilo vino mami u toć, da
vi Hare Krišna ne jite krave jerbo su van Svete. A oli nama isto nisu Svete
rekla je baba, Pogledaj kolike su cine u mesnicaman. Ma kako morete jist
krave rekla je mama, pogledajte in u Oči pa čete vidit da one isto jemadu
Dušu. A kako ču in vidit u oči kad baba uvik vazme biftek a nikad glavu reka
je dida. Nemojte tako govorit isprid dice reka je Tata, oni su Bakte i nikad
nisu jili meso. Je, zato su ti tako dežbijego, rekla je baba. Daj bogati
sine dici malo kokošje juve da se okripidu. Tata je onda reka da mi ne jimo
Krave jerbo su one naši Prijateji, a baba mu je odgovorila da nisu njiovi i
da se nikad nije upoznala ni družila ni sa jednon Kravon. Kako nisi reka je
Dida, a tvoja prijatejica gospoja Dominka? Je kad boje promislin u pravu si
rekla je baba, okad san se za tebe udala družin se sa volon. Je reka je
dida, a ti si obična kokoš i rodila si sina gudina koji je oženija
najobičniju kozu koja krešti ka svraka, a dica su in dosadna ka čimavice.
Astigamande sine, otvorija si mi oči. Životinje su naši prijateji i nas
najuži rod. A baba je rekla didu da je debeli krmak koji od nazad liči na
Slona a od naprid na majmuna, a on njoj da kad stavi Šešir liči na tuku
ispod peke. Nisan više moga podnit te aparade i posta san jidan ka pas, pa
san reka didu: moji Mama i Tata su Krišnini Bakte koji su poput Polubogova,
a Ti i baba ste najobičniji Demoni ča sišete krv i poput ste crva u Izmetu.
A dida je reka, Je treba si jučer vidit svog Oca poluboga kako čisti
septičku jamu iza kuće. A mater je rekla, Svekre, vama bi bilo boje da
očistite septičku jamu svojega Srca i onda su se svi posvadili i mi smo
pokupili kufere i išli do auta. Onda tata nije moga upalit auto i otvorija
je haubu i reka: Astimišamaloga, riknili su mi kartipufna i cincilator. Onda
je tata još jedan cili dan radija oko Auta ka magarac, a mi smo dobili još
malo Vrimena da u Moru guštamo ka prajci.
napisa: jour Servant bh. duje